eddoboozi

Joomla! offers three different types of messages. Creatings standard information about Joomla! system is presented depending on a message type as follows:

Error

• This is a sample message

Error

• This is a sample warning message

Error

• This is a sample error message

Baminisita mu gavumenti; Syda Bbumba ne Kidhu Makubuya bandiremwa okuwona okuggyibwamu obwesige ku bigambibwa, nti baasalawo okuliyirira nagagga Hassan Basajjabalaba obulindo bw’ensimbi mu bukyamu. Kino kiddiridde ababaka abawomye omutwe mu kukuᵑᵑaanya emikono egyokubaggyamu obwesige okuweza emikono egisoba mu 100 nga kati kisigadde kubaga biteeso bya kwanja mu palamenti basobole okubaggyamu obwesige. Okusinziira ku mubaka w’abavubuka mu buvanjuba bwa Uganda, Peter Ogwang akulembeddemu omulimu gw’okunoonya emikono, baaweereddwa nsalessale w’okubeera nga bamuse ofiisi zaabwe olunaku lw’eggulo oba si ekyo ba kugenda mu maaso okubaggyamu obwesige. “Mu kiseera kino tulina emikono gy’ababaka 130 era baminisita bano balina kukoma lw’eggulo (jjo ku mmande) bwe batuusa enkya nga bakyali mu ofiisi zaabwe, tugenda kubasindiikiriza baziveemu nga tubaggyamu obwesige,” Peter Ogwang. Omubaka wa Ndorwa East, Wilfred Niwagaba yagambye nti, “Wadde tukyayagala emikono emirala naye kati emikono egyetaagisa tumaze okugiweza era mu kiseera kino tugenda kutandika okubaga ebiteeso ebyokwanjula mu palamenti tusobole okubaggyamu obwesige.” Kyetaagisa emikono 125 okusobola okukola ekiteeso ekiggyamu minisita yenna obwesige singa wabaawo obwetaavu bw’okukikola. Omumyuka wa ssentebe w’akabondo ka NRM, David Bahati, yategeezezza nti, “Kino ekikolebwa mu kiseera kino kiraga nti palamenti mmalirivu okulwanyisa enguzi okugimalira ddala mu bakungu ba gavumenti ng’ekozesa amakubo amatuufu.” Minisita akwasisa empisa, Simon Lokodo, yagambye nti, “Baminisita bano bombi bagwanidde okwegoba nga bukyali kubanga kijja kuba kibawonyezza okuswazibwa ababaka ba palamenti abaswakidde okubaggyamu obwesige.” Gye buvuddeko, Pulezidenti Yoweri Kaguta Museveni yategeeza akakiiko ka palamenti akavunaanyizibwa ku nsimbi y’omuwi w’omusolo, nti baminisita bano balagajjalira emirimu gyabwe ne basasula Hassan Basajjabalaba, obuwumbi 142 oluvannyuma lwa gavumenti okusazaamu kontulakita z’okuddukanya obutale mu Kampala, kampuni ze ze zaali ziwangudde. Wabula bombi bano bagaanye okubaako ne kye boogera ku nsonga y’okubaggyamu obwesige. “Aha nedda ssebo nsoyiwa sijja kuddamu bibuuzo bya bannamawulire ku nsonga eyo mu kiseera kino,” Bbumba. So nga ye Makubuya yagambye nti, “Mukwano gwange, sirina kyenyinza kukugamba ku nsonga eyo.” LWAKI BAMINISITA BANO TEBAJJA KUWONA? • Baalagajjalira emirimu gyabwe mu kuliyirira Basajjabalaba. • Makubuya yalemwa okutuukiriza obuvunaanyizibwa bwe obwokutaputa amateeka agalaga nti waliwo ekkomo gavumenti lyeteekeddwa okukomako okusasula, so nga Bbumba yalemwa okwekenneenya ebiwandiiko kwe yasasulira Basajjabalaba ensimbi. • Ababaka bamalirivu okulwanyisa enguzi. • Baawaayo omusimbi muyitirivu nnyo.

Omutukuvu Paapa Benedict XVI asabye bannabyabufuzi mu Uganda okufangayo ennyo okukola ebintu ebikulaakulanya bannayuganda mu kifo ky’okwekkusa embuto. Mu bubaka bwe obwomwaka bwe yatisse omubaka we wano, Ssaabasumba Paul Tschang In-Nam mu kitambiro ky’emmisa mu lutikko e Lubaga, Paapa yategeezezza nga bannayuganda bwe bakyetaaga enkulaakulana mu by’obulamu n’ebyenjigiriza okusobola okutuukana n’omutindo gw’ensi yonna. “Abakulembeze basaanye okwongera amaanyi mu kukulaakulanya ebyobulamu n’ebyenjigiriza by’abantu, basobole okukulaakulana,” Ssaabasumba Paul Tschang. Omubaka wa Paapa era yategeezezza ng’obwenkanya naddala mu kkooti z’amateeka bwe bukyabulamu, ekireetedde bannayuganda bangi okubulwa emirembe n’ebbeetu okuwaabira abo ababazzaako emisango. Ate ye Ssaabasumba w’essaza ekkulu erye Kampala, Dr. Cyprian Kizito Lwanga yasoomoozezza gavumenti okuyimbula abasibe bonna abavundira mu makomera naddala abaasibwa olwensonga z’ebyobufuzi ng’akabonero ak’okujaguza Uganda okuweza emyaka ataano egyokwefuga. Ssaabasumba yagambye nti tekyalina kyamaanyi ky’evunaana bantu baasibibwa lwa byabufuzi n’abo abaasibwa mu ngeri etali ya bwenkanya era n’asaba ebayimbule bayambeko mu kukulaakulanya eggwanga. “Nkubira gavumenti yaffe omulanga eyimbule abo bonna abaasibwa naddala abaasibwa olwensonga ez’obyobufuzi,” Dr. Lwanga bwe yategeezezza mu bubaka bwe omwaka 2012 mu kitambiro kya mmisa ku lutikko e Lubaga. Mu ngeri y’emu yakubirizza bannabyabufuzi naddala abali mu gavumenti okwewala ebikolwa ebyokulya enguzi mu mwaka omupya, eggwanga lisobole okukulaakulana obulungi.