Akulira akakiiko k’ebyettaka mu Kampala ayise aba Owino abakwase ekyapa kya liizi |
 |
|
Akulira akakiiko k’ebyettaka mu Kampala, munnamateeka Yusuf Nsibambi agambye nti ku bbalaza nga 28 lw’agenda okusisinkana abasuubuzi abakolera mu katale ka Owino abakwase ekyapa ne liizi yaabwe mu butongole, batandike okukeekulaakulanyiza. Bino byonna biddiridde aba Owino okumalawo akagulumbo ke babadde nako mu bukulembeze bwabwe ne bakkiriza ab’ekiwayi ekikulemberwa Godfrey Kayongo ekya St. Balikuddembe Market Stalls and Lock up Shop Owners Association be baba bakwasibwa liizi y’ekyapa okukakulaakulanya. Nsibambi yategeezezza olupapula lwa Eddoboozi nti, “Tetulina nsonga yonna ku kibiina kyalondeddwa, ffe kye tubaagalamu kimu kyokka, kugondera ensonga ezibaweesezza ekyapa kya liizi eno. Kati abasuubuzi tugenda kubakwasa ebiwandiiko by’ekyapa kya liizi y’akatale kaabwe ku mmande.” Akatale kano kabadde kaludde nga kalimu emivuyo wakati w’ekibiina kya SLOA ekikulemberwa Kayongo n’ekya Cooperative ekikulemberwa John Baptist Kivumbi era nga ze zimu ku nsonga KCCA z’ebadde yeekwasa obutabawa liizi. Ssentebe w’akakiiko k’ebyettaka, Yusuf Nsibambi olwamaze okusuuza Dayirekita wa Kampala, Jennifer Musisi liizi y’ekyapa n’awa abasuubuzi bano amagezi bakwatagane ne ssentebe w’eggombolola y’omukulu w’ekibuga, Godfrey Nyakana bamubuulire ku biwayi byombi gwe basazeewo okukwasa liizi. “Tusembye aba SLOA nti be bagenda okuweebwa ekyapa kya liizi y’akatale kubanga tutunudde mu mpapula zaabwe nga tebalina mutawaana. Tukkaanyizza era twagala abasuubuzi bonna babeere bumu nga bwe balwanirira enkulaakulana ey’awamu,” Nyakana bwe yategeezezza Eddoboozi. Kayongo bwe yatuukiriddwa eggulo yagambye nti yadde nga kye baali baagala bakituuseeko, tebagenda kuweera. Baagala Dayirekita wa Kampala, Jennifer Musisi abaddize ensimbi zaabwe ezisoba mu buwumbi 4 ze yabasoloozaako. “Twagala Musisi atuwe ensimbi zaffe kubanga yalemereddwa okutuwa ekyapa. Akaseera kano tuli mu kusaba Mukama atulwanirireko kubanga omukyala oyo yafuuka muzibu,” Kayongo bwe yagambye. BATTE LULE KIRWANA NE MUKASA IVANIE MALE |